Sri Lanka përgatitet për më shumë trazira, Presidenti i ri zotohet të shtypë protestat

Kundërshtimi popullor ndaj zgjedhjes së Ranil Wickremesinghe nga deputetët, mund të kalojë në dhunë pasi ai zgjodhi një shok të vjetër shkolle si Kryeministër.

Sri Lanka u përgatit për më shumë trazira pasi Presidenti i sapoemëruar, Ranil Ëickremesinghe, u zotua të shtypë protestat që rrëzuan paraardhësin e tij, duke i dënuar ato si “kundër ligjit”.

Në fjalën që mbajti pasi deputetët e zgjodhën atë si pasardhës të ish-Presidentit Gotabaya Rajapaksa, Ranil Ëickremesinghe e bëri të qartë se nuk do të toleronte ata që ai perceptonte se po nxisin dhunën.

“Nëse përpiqesh të rrëzosh qeverinë, të pushtosh zyrën e Presidentit dhe Kryeministrinë, kjo nuk është demokraci; është kundër ligjit”, tha ai.

“Ne do t’i trajtojmë me vendosmëri sipas ligjit. Ne nuk do të lejojmë që një pakicë protestuesish të shtypin aspiratat e shumicës së heshtur që thërret për një ndryshim në sistemin politik.”

Wickremesinghe, 73 vjeç, u betua si presidenti i tetë i Sri Lankës në një ceremoni të vogël të enjten në mëngjes. Ai bëri betimin e tij të detyrës përpara kryetarit të drejtësisë Jayantha Jayasuriya në kompleksin e parlamentit të ruajtur fort në Colombo, thuhet në një deklaratë nga zyra e tij.

Shefi i policisë së Sri Lankës dhe forcat e larta ushtarake qëndruan pas Presidentit të ri ndërsa betimi u krye në prani të kryetares së parlamentit Mahinda Abeyëardana. Ndër deputetët që u mblodhën më pas për ta uruar ishte edhe ish-Presidenti dhe Kryeministri Mahinda Rajapaksa, vëllai i madh i ish-Presidentit Gotabaya Rajapaksa.

Wickremesinghe pritej të emëronte kreun e parlamentit dhe shokun e vjetër të shkollës, Dinesh Gunawardena si kryeministër. Gunawardena njihet si një besnik i fortë i Rajapaksa-s dhe shërbeu si Ministër i Kabinetit kur Mahinda Rajapaksa ishte President dhe më pas përsëri kur Gotabaya Rajapaksa u bë President.

Ditët e fundit, Wickremesinghe, i cili shpalli gjendjen e jashtëzakonshme këtë javë, kishte bërë deklarata duke i quajtur protestuesit “fashistë” dhe duke treguar se nuk do të kishte frikë të shtypte demonstratat.

Më pak se një orë pasi ai u shpall President të mërkurën, u lëshua një urdhër gjykate që ndalonte këdo që të mblidhej brenda një rrezeje 50 metrash të një statuje që qëndron në Galle Face në Colombo, ku protestuesit e nxitur nga kolapsi ekonomik i vendit janë ulur jashtë për muaj të tërë.

Megjithatë, njerëzit e kundërshtuan urdhrin dhe dhjetëra u mblodhën në shkallët e zyrave të Presidentit, të cilat janë ende të pushtuara nga lëvizja protestuese, për të bërtitur me thirrjet “marrëveshja Ranil” – një referencë për reputacionin e Wickremesinghe si një politikan mashtrues – si dhe ” grabitës i bankës Ranil”, duke iu referuar një mashtrimi me obligacione bankare ku ai ishte i implikuar. Qindra policë dhe ushtarakë qëndruan në periferi, por nuk ndërhynë në tubim.

Pasi u zgjodh nga deputetët si president, Wickremesinghe u bëri thirrje partive opozitare për “fund, përçarjes” dhe tha se donte “të bashkonte të gjithë në mënyrë që të formohej një konsensus kombëtar për të ecur përpara”.