Gazeta RD
Kryetari i PD, Sali Berisha deklaroi sot se, nuk ka qejfmbetje me presidentin Ilir Meta në lidhje me dekretin e firmosur në Stamboll.
Por Berisha tha se ekzistonte mundësia që votimi i presidentit të shkonte në raundin e pestë.
Sipas tij, kishte shanse që ky raund të dështonte, çka mund ta çonte vendin në zgjedhje.
“Nuk kam qejfmbetje me Metën. Do doja ta shtynte për raundin e pestë dhe shanset për një dështim nuk ishin të vogla”, tha Berisha.
Pyetje: Presidenti tha nuk ka krisje me ju, po ju keni një qejfmbetje me Metën?
Berisha: Jo, jo asnjë! Të vetmen qejfmbetje që kam, që do doja ta kishte shtyrë për raundin e pestë dhe shanset për një dështim të raundit të pestë nuk ishin të vogla.
Pyetje: Mendoni se po i jep sinjale Ramës për një bashkëpunim Meta me këtë veprim?
Berisha: Jo, nuk mendoj. Normalisht. Gërma e Kushtetutës nuk parashikon mundësinë e firmosjes së dekretit kudo që ndodhet presidenti, fryma është tjetër.
Pyetje: Pasi z.Meta të lërë Presidencën përfundimisht a do të bëni së bashku opozitë?
Berisha: Pa diskutim. S’ka diskutim ajo punë. Ajo është normale. Në qoftë se mund të kemi diferenca në gjëra të tilla, asgjë nuk na pengon ne në betejën tonë kundër Edi Ramës.
Pyetje: Presidenti Meta ditën e djeshme nuk e ka mohuar dhe as e ka pohuar mundësinë e një bashkëpunimi me kryeministrin Edi Rama. A i druheni sërish një tradhtie nga z. Meta?
Berisha: Jo nuk i druhem. Nuk i druhem aspak asnjë tradhëtie.
