Gazeta RD
Megjithëse u larguan në verë, Lionel Messi dhe Cristiano Ronaldo e mbyllën vitin 2021 si golashënuesit më të mirë të Barcelonës dhe Juventusit, përkatësisht.
Messi u largua nga Barcelona pasi klubi nuk qe në gjendje t’ia vazhdojë marrëveshjen për shkak të telasheve financiare dhe rregullave të La Ligës, dhe iu bashkua PSG-së si lojtar i lirë në gusht.
Argjentinasi i shënoi 28 gola nga janar deri në qershor për Barcelonën, 13 më shumë se Antoine Griezmann me 15, i cili u largua në verë po ashtu dhe u kthye në Atletico Madrid.
Memphis Depay i shënoi 8 gola këtë vit për Barçën, të cilës iu bashkua në verë. I treti me më së shumti gola të Barça në vitin 2021 është Frenkie de Jong me 7, ndërsa Ousmane Dembele i katërti me 6 gola.
Ndërkohë, Ronaldo i shënoi 20 gola për Juventusin në gjashtë muajt e parë të vitit 2021 dhe është golashënuesi më i mirë i bardhezinjve për këtë vit, pavarësisht se u largua në verë për t’u kthyer në Manchester United.
Alvaro Morata ngeli i dyti me 17 gola, ndërsa Federico Chiesa i treti me 15 gola dhe Paulo Dybala i katërti me 11 gola në vitin 2021.
Fakti se Messi dhe Ronaldo e mbyllin vitin si golashënuesit më të mirë të ish-skuadrave, edhe pse u larguan në verë, tregon se sa shumë iu mungojnë ata Barçës dhe Juves.
